“ഈ മിന്നാമിനുങ്ങിന്റെ ഇംഗ്ലീഷെന്താ കിട്ടേ?”
നട്ടപ്പാതിരായ്ക്ക് മുറ്റത്തെ കൂരിരുട്ടിലേക്ക് കണ്ണുംനട്ട് ചിന്താവിഷ്ടയായിരുന്ന ആ ഒന്നാംക്ലാസ്സുകാരിയിൽനിന്ന് ഇത്രയോളം വലിയ സംശയമേ ഞങ്ങളും പ്രതീക്ഷിച്ചിരുന്നുള്ളൂ.
ചോദിച്ചതാവട്ടെ, ബീയെസ്സീ സുവോളജി സെക്കന്റിയർ സ്റ്റുഡന്റും സർവോപരി ചോദ്യകർത്താവിന്റെ ചിറ്റയുമായ എന്റെ അനിയത്തിയോട്!
“മിന്നാമിനുങ്ങിന്റെയോ? അത്…
നീ പോയേ, എനിക്ക് പഠിക്കാനുണ്ട്”
സൈന്റിഫിക് നെയിം വല്ലോം ആയിരുന്നേൽ ഞാനിപ്പോ പറഞ്ഞുതന്നേനേ എന്നമട്ടിൽ ഇല്ലാത്ത ടെക്സ്റ്റ് ബുക്കും തുറന്നുപിടിച്ച് അതിവിദഗ്ദമായൊരു ഒഴിവാക്കൽ/രക്ഷപെടൽ!
“മോളു പോയി മാമനോട് ചോദിക്ക്”
പണി ഡൈവേർട്ടായി ഇങ്ങോട്ടാണ് വരുന്നതെന്ന് ഉറപ്പിച്ചപ്പോത്തന്നെ കയ്യിലിരുന്ന ഫോണിൽ ഓപ്പണായിക്കിടന്ന ഓപ്പെറാ മിനിയിൽ പുതിയൊരു ടാബ് കൂടി സൃഷ്ടിക്കപ്പെട്ടു…
Google…! (രക്ഷകൻ രക്ഷകൻ)
സേർച്ച് ബോക്സിൽ minnaminungu ന്നു ടൈപ്പ് ചെയ്തു തുടങ്ങുമ്പോളേക്കും കുഞ്ഞുമിന്നാമിന്നി മടിയിൽ സ്ഥാനംപിടിച്ചിരുന്നു.
“മാമാ, ഈ മിന്നാമിനുങ്ങിനു ഇംഗ്ലീഷിൽ ന്താ പറയുന്നേ?”
ചോദ്യം അവളുടേതാണെങ്കിലും അനിയത്തിയും അമ്മയും കസിൻസുമടക്കം വലിയൊരു വിമർശകനിരതന്നെ എന്റെ മറുപടിയ്ക്കായി കാതോർത്തിരിക്കുന്നപോലെ എനിക്കു തോന്നി.
എയർട്ടെലാണ് ഫോർജിയാണ് എന്നൊക്കെ പറഞ്ഞിട്ടെന്താ, സമയത്ത് ഉപകാരപ്പെടൂല്ലല്ലോ.
ചോദ്യത്തിനും ഉത്തരത്തിനുമിടയ്ക്കുള്ള അപകടകരമായ ലാഗ്!
ഗ്യാപ്പ് ഫിൽ ചെയ്യാനായുള്ള സൈക്കോളജിക്കൽ മൂവ് എന്നോണം നെക്സ്റ്റ് റീസണബിൾ ക്വസ്റ്റ്യൻ;
“കിട്ടയോട് ചോദിച്ചില്ലേ മോള്?”
“കിട്ടക്ക് പഠിക്കാനുണ്ട് ന്നു പറഞ്ഞു”
“ഓഹോ! മിന്നാമിനുങ്ങിനെക്കുറിച്ച് എസ്സേ എഴുതിത്തരാനൊന്നും അല്ലല്ലോ പറഞ്ഞത്, അറിയില്ലേൽ അതങ്ങു പറഞ്ഞാപ്പോരേ. ഒരു സുവോളജിക്കാരി”
(അവസരം മുതലാക്കി വാരിവിതറീ ഒരുകൊട്ട പുച്ഛം!)
ഗൂഗിള് ചതിച്ചില്ല!
ഒന്നാംപേജിൽത്തന്നെ വിക്കിയുടെ പീടികയിലേക്കു തുറന്ന വാതിൽപ്പടിയിൽ എന്റെ അഭിമാനം…
Glow worm, Fire fly
“മോളൂ, മിന്നാമിനുങ്ങിന്റെ ഇംഗ്ലീഷാണ്, ഫയർ ഫ്‌ളൈ.
എന്താണ്???”
“ഫയർ ഫ്‌ളൈ!”
അങ്ങനെ ആക്രമിക്കാൻ ഒരുങ്ങിനിന്ന ഒരുപറ്റം ശത്രുക്കളെ നിശ്ശബ്ദമായി നിശ്ശബ്ദരാക്കിക്കൊണ്ട് മനസ്സിൽ ഗൂഗിളിന് മെൻഷനിട്ടൊരു കടപ്പാട് കൊടുത്ത് മുഖത്തൊരു ഭാവവ്യത്യാസം പോലുമില്ലാതെ ഒരു കുഞ്ഞു വിജയാഘോഷം! # win ✌
ഒന്നരക്കൊല്ലംമുമ്പ് ഒരു ലൈവ് ഡിബേറ്റിന്റെ ഭാഗമായിട്ട് സേം മെത്തേഡിൽ കൊക്കിന്റേം കുളക്കോഴീടേം ശാസ്ത്രീയ നാമങ്ങൾ പറഞ്ഞുകൊടുത്ത് സ്റ്റാർ ആയത് ഓർക്കുന്നു!
-DeOn-
Read this original post on Facebook
💬 Add a comment to this post
Your comment goes straight to Deon — nothing shows up here until he has reviewed it.
Add a comment →